1Cor 8 | BEF | STEP | To faga lugefa nasanamofihi seba'a nelata hi'ahana yamofihi keheluto lu lepilube'mu nohube. Lali asaga bona'magita ana'ina hapa hapa'a akehelilata nohune lite nelafihe? Yamofihi keheli'ahanaya hapa'a kehelise ago keheliletetini lenugufa le'momo titi nehabe. To komopatini ai eminogo ai eminogo hite to ai he'menogo ai he'menogo hite minalana ya nasanauba lufusatini lolo hu'ehinogo bati hite minalana yabe.

1 Corinthians 8

Faga lugefa nasanamofihi seba'a epilata nehana ka'a

1 To faga lugefa nasanamofihi seba'a nelata hi'ahana yamofihi keheluto lu lepilube'mu nohube. Lali asaga bona'magita ana'ina hapa hapa'a akehelilata nohune lite nelafihe? Yamofihi keheli'ahanaya hapa'a kehelise ago keheliletetini lenugufa le'momo titi nehabe. To komopatini ai eminogo ai eminogo hite to ai he'menogo ai he'menogo hite minalana ya nasanauba lufusatini lolo hu'ehinogo bati hite minalana yabe. 2 Luga'amagi enali kehelise'nati napa huto ni'ibe lilana ya'ma enali kumu lilune. Kehelise'namofihi legeya'a mone'a hiti meli'ahabe luto lilune. 3 Luga'amagi enali komopa'ani Hu'mamofitoga molo hetofa hilana enali ya'ma Hu'mau kehelinogo bati hilune'mu habe.

4 Ya hu'ehina faga lugefamofihi seba'amu ya'ma luto kehelilata nohune: Faga lugefa ai ya'ma nasana lamana'a meni'ibe. Hu'mau ai moneko lamana'a nohibe. 5 Fato fagalo kene'i silaga'i kokulumagu to melugu nehabe lite lilata nehabe. To foipa lugefanamofihi sipi bona'i to enigihiti nehana kene'i babu luto nehana keheli'ahanaya. 6 Lali ya'ma Hu'ma afotifu moneko'i nohibe luto keheli'ohutamo ni'inagi aitogati ana'ina silaga'i huto hu su ho'ehina. To laliya ai kumu ni'ibe luto hilune luto nohune. To Sipi Bo moneko'i Yesu Kilisitohi ai yanagu ana'ina silaga'i huto hu'ehina to lali ai yanuguko nohune.

7 Ya huto ni'inaya bona'i luga'a enali ya'ma hapa'a ya huto ni'ibe lite mone keheliya ilana'a mehabe. To ya hana'amagi enali koyapa'i to yatai hiti lugefamo lusi kene'i nohibe lite kehelilata hi'ahanamagi komopa'ani lapa mebi'ehinagi to enali seba'a nete ana lugefamofihi amuya'amu keheligo ketana lolo nohigo nete komopa'ani le'mo sibina hilata hi'ahanamo ni'ibe. 8 Hu'mau ai nose'na nonotana to menonotana yamofihi kehelinogo sibina lolo mehilube'mu hibe. Seba'a nolata'na yamofihi kehelinogo sibina hilifihe? To menolata'na kehelinogo bati hilibe. Aitoga ya huto meni'ibe.

9 To bonatinitoga mone ya huto ni'ifi, meni'ifi kehelilo. Fa'mene luga'amagita lenali lenegekesa kehelite fa'mene nalune lite nehana'amagita lenalalutinigihi mono kagu amuya memele'ahanamagihi enali komopa'ani li sibina hi lalagi, ya'mu kehelinogo keta lepesino. 10 Kai komopaka hokolo hinogo minalata lugefa nasanamofihi nonugu seba'a noto nehitogo, kalalukafu moneuba kehelinogo komopa'a keta huto lapa mebinogo nohilinauba bu kogoloto ya'ma luto lilina'mu yabe: Nonanago nani ana huto nalube luto luloto nalube'mu hibe. 11 Noloto'a ya'ma kalalukafu mono ka'a nesi'a keheli'ehina bouba Kilisitou mina fi'ehinamo ni'inago kai komopakagu buloto foipa huto sibina mehilina ni'ifihe? 12 Lenali ya suhi nehite lenalalutinigihi enele'mo mumusopa i epelete komopa'ani enele'mo sibina hilata nehabe. Komopa'ani li sibina hi epalalana ya'ma Kilisitohi le'mo sibina hilana'a suhi huto lolo hilina'mu yabe. 13 Ya hu'ehina'mu nani lugefa nasanamofihi seba'a nenenogo nalalu'nifu ya nasana'mu yabe luto keheli sibina hu lalibe luto ai kumu kehelugo keta hu lalifihe luto lugefanamofihi seba'a mo sito nohuto minomo buto minalube.